او آئی سی نے کشمیر پر پاکستانی موقف کی بھرپور حمایت کی ، حافظ طاہر اشرفی
حافظ طاہر اشرفی نے پریس کانفرنس کرتے ہوئے کہا او آئی سی کا اعلامیہ پاکستان کی خارجہ پالیسی کی کامیابی ہے۔ اجلاس سے قبل پراپیگنڈا کیا گیا کہ او آئی سی ایجنڈا میں کہیں کشمیر کا ذکر نہیں۔ 57 ممالک نے متفقہ طور پر کشمیر پر پاکستان کے موقف کی حمایت کی۔
انہوں نے کہا وزیراعظم عمران خان نے توہین رسالت کے حوالے سے بین الاقوامی قانون کا مطالبہ کیا۔ 12 ربیع الاول سے ایک دن قبل وزیراعظم نے پوری اسلامی دنیا کو خطوط لکھے کہ متفقہ اقدام اٹھایا جائے۔ علما و مشائخ کے ساتھ تمام سیاسی و مذہبی جماعتوں کو توہین رسالت، کشمیر سمیت دیگر ایشوز پر امہ کی تائید پر حکومت کو تحسین پیش کرنا چاہیئے۔
حافظ طاہر اشرفی بولے آج ان لوگوں کو فلسطین یاد آگیا مگر جب مسجد اقصیٰ تین دن بند رہی تو ایک سابق حکومت نے مذمت تک نہیں کی۔ عمران خان کا اسرائیل کے حوالے سے واضح اور دوٹوک موقف ہے۔