پنجاب میں ہفتہ شان رحمت اللعالمین ﷺ کی تقریبات، میلاد کی محفلیں

لاہور (92 نیوز) پنجاب بھر میں ہفتہ شان رحمت اللعالمینﷺ کی تقریبات، علمائے کرام اور مشائخ عظام نے آقا کریم کی شان بیان کی، کئی شہروں میں میلاد کی محفلیں، نعت خوانوں نے دل موہ لئے، سرگودھا یونیورسٹی میں اسلامی خطاطی نمائش کا اہتمام کیا گیا، لاہور، ننکانہ، سانگلہ ہل اور دیگر شہروں میں بھی تقاریب ہوئیں۔ نبی کریمﷺ کی عزت وناموس اہل اسلام کو اپنی جان سے بھی عزیز، لاہور سمیت پنجاب بھر میں سرکار دوعالم ﷺ کی شان بیان کرنے کا سلسلہ جاری ہے۔ یونیورسٹی آف سرگودھا میں ہفتہ شان رسالت ﷺ کی مناسبت سے اسلامی خطاطی نمائش کا اہتمام کیا گیا، شرکاء نے نمائش کو خوب پذیرائی بخشی۔ لاہور انویسٹی گیشن ہیڈ کوارٹرز میں شان رحمت اللعالمین ﷺکے سلسلہ میں محفلِ نعت کا انعقاد کیا گیا جس میں حضور ﷺ کی شان اقدس میں گلہائے عقیدت کے نذرانے پیش کئے گئے۔ پاکپتن میں ہفتہ رحمت العالمین کے حوالے سے دربار بابا فرید الدین مسعود گنج شکر میں محکمہ اوقاف کے زیر اہتمام محفل میلاد کا انعقاد کیا گیا۔ رحیم یار خان میں انجمن آڑھتیاں سبزی منڈی کی جانب سے سیرت النبی کانفرنس ہوئی۔ بہاول پور میں ہفتہ شانِ رحمت اللعالمین کے سلسلہ میں کمشنر آفس بہاول پور سے فرید گیٹ تک ریلی نکالی گئی۔ گوجرانوالہ میں ضلع کونسل ہال میں سیرت النبیؐ کانفرنس کا انعقاد کیا گیا، جس میں گرودوارہ روہڑی سنگھ کے ہیڈ گرنتھی اورمسیحی پاسٹرز نے خصوصی شرکت کی۔