اسلام آباد پولیس کی امریکی شہری سنتھیا ڈی رچی کے خلاف مقدمہ درج کرنے سے معذرت
اسلام آباد (92 نیوز) اسلام آباد پولیس نے امریکی شہری سنتھیا ڈی رچی کے خلاف مقدمہ درج کرنے سے معذرت کر لی۔
ایڈیشنل سیشن جج زیبا چوہدری نے امریکی شہری سنتھیا ڈی رچی کے خلاف اندراج مقدمہ کی درخواست پرسماعت کی۔ اسلام آباد پولیس نے سنتھیا ڈی رچی کے خلاف مقدمہ درج کرنے سے معذرت کرتے ہوئے ایف آئی اے سائنرکرائم ونگ کا معاملہ قراردے دیا۔
تھانہ بنی گالا پولیس نے جواب جمع کروایا اور موقف اختیار کیا کہ تمام الزامات سوشل میڈیا پرلگائے۔ ہمارے دائرہ اختیار میں نہیں کہ سوشل میڈیا کے معاملہ پر مقدمہ درج کریں۔ ایف آئی اے کا کیس بنتا ہے، استدعا ہے کہ مقدمہ اندراج کی درخواست داخل دفتر کی جائے۔
وکیل نے دلائل دیتے ہوئے کہا کہ ہماری درخواست پر تعزیرات پاکستان کی دفعات بنتی ہے۔ دفعہ 500 اور 505 کے تحت پولیس کو مقدمہ درج کرنیکا اختیار ہے۔ پولیس صرف بہانہ بنا رہی ہے۔
عدالت نے ایف آئی اے کا کیس بنانے کے حوالے سے پولیس سے تفصیلی جواب طلب کرتے ہوئے کیس کی سماعت 17 جون تک ملتوی کر دی۔