20 لاکھ رجسٹرڈ ٹیکس گزاروں کیلئے آن لائن پروفائل کا قانون متعارف

 اسلام آباد (92 نیوز) آئی ایم ایف کی ایک اور شرط پوری کر دی گئی۔ 20 لاکھ رجسٹرڈ ٹیکس گزاروں کیلئے آن لائن پروفائل کا قانون متعارف کروا دیا گیا۔ انکم ٹیکس آرڈیننس میں نئی شق 114 اے شامل کر دی گئی۔ حکومت نے آئی ایم ایف کا کہا مان لیا۔ قانون کے تحت ٹیکس گزار کو بینک اکاؤنٹ ، یوٹیلیٹی کنکشن ، اسٹوریج ، پرچون ، کمرشل اور رہائشی پراپرٹیز کی تفصیلات دینا ہوں گی ۔ صنعتی پیداوار کا حجم بھی بتانا لازمی ہو گا۔ لیز پر دیئے گئے کاروبار اور پراپرٹی کی تفصیلات کے ساتھ پروفائل میں آمدن کی تفصیل کے ساتھ وضاحت کرنا ہو گی۔ دستاویزات کے مطابق ٹیکس گزار ہر 3 ماہ بعد پروفائل کو اپ ڈیٹ کرے گا۔ نان پرافٹ اداروں ، ٹرسٹ اور فلاحی اداروں پر بھی قانون کا اطلاق ہو گا۔ دستاویزات میں کہا گیا ہے کہ جو ٹیکس گزار آن لائن پروفائل نہیں دے گا اس کی رجسٹریشن منسوخ کر دی جائے گی۔