گوجرانوالہ: سکول میں دہشتگرد کارروائی سے نمٹنے کیلئے ریہرسل، پولیس ودیگر قانون نافذ کرنیوالے اداروں کے جوانوں کی شرکت

گوجرانوالہ (نائنٹی ٹو نیوز) گوجرانوالہ کے ایک اسکول میں دہشت گرد کارروائی کے دوران ہنگامی صورتحال سے نمٹنے کیلئے پولیس اور قانون نافذ کرنیوالے اداروں کے جوانوں نے حملے کو ناکام بنانے اور بچوں کی حفاظت کیلئے ریہرسل کی۔ ماڈل ٹاؤن میں گورنمنٹ جامع ہائی اسکول میں پولیس، ایلیٹ فورس اور اسپیشل برانچ کے جوانوں نے ممکنہ دہشت گردی سے نمٹنے کیلئے ریہرسل میں حصہ لیا۔ اس دوران ایلیٹ فورس کے جوان دہشت گردوں کے حملے کی اطلاع پر کوئیک رسپانس دیتے ہوئے جائے وقوعہ پر پہنچے اور سرچ آپریشن کر کے دہشت گردوں کے ہاتھوں یرغمال بنائے گئے بچوں کی بحفاظت بازیابی اور محفوظ مقام پر منتقلی کےعلاوہ آپریشن کر کے سکول میں چھپے دہشت گردوں کو قابو کرنے کا عملی مظاہرہ کیا۔ پولیس حکام کا کہنا ہے کہ انتہائی حساس قرار دیئے گئے سکولوں میں ریہرسل کی جا رہی ہے جس کا مقصد کسی بھی ہنگامی صورتحال کے دوران آپریشن میں حصہ لینے والے جوانوں کی کارکردگی کو جانچنا اور اسکول عملے، بچوں کی تربیت کرنا ہے تاکہ ایسے کسی حملے کی صورت میں سکول عملے اور بچوں کے بچاؤ میں آسانی ہو۔