ڈونلڈ ٹرمپ اور کم جونگ ان کے درمیان ملاقات کے وقت کا اعلان ہو گیا

واشنگٹن (92 نیوز) وائٹ ہاؤس کی جانب سے ڈونلڈ ٹرمپ اور کم جونگ ان کے درمیان تاریخی ملاقات کے وقت کا اعلان کر دیا ۔ تاریخی ملاقات سنگاپور میں پاکستانی وقت کے مطابق صبح چھ بجے ہو گی۔ ترجمان وائٹ ہاؤس سارہ سینڈرز  نے بریفنگ دیتے ہوئے بتایا کہ صدر ڈونلڈ ٹرمپ اور کم جونگ ان کے درمیان  ملاقات بارہ جون کوسنگاپور میں مقامی وقت کے مطابق صبح نو اور پاکستانی وقت کے مطابق صبح چھ بجے ہو گی۔ ملاقات کیلئے تیاریاں حتمی مراحل میں ہیں ۔ انہوں نے کہا کہ صدر ٹرمپ کو شمالی کوریا سے متعلق روزانہ سکیورٹی بریفنگ دی جارہی ہے۔ اس سے قبل ٹرمپ نے ملاقات منسوخ کر دی تھی۔ قبل ازیں شمالی کوریا  کے سابق انٹیلی جنس سربراہ کم یونگ چول وائٹ ہاؤس پہنچے جہاں انہوں نے صدر ٹرمپ کو کم جونگ اُن کا لکھا ہوا خط پیش کیا۔ یہ ملاقات نوے منٹ تک جاری رہی۔ صحافیوں سے گفتگو میں ٹرمپ نے تصدیق کی کہ وہ طے شدہ پروگرام کے تحت بارہ جون کو سنگاپور میں  شمالی کورین سربراہ سے ملاقات کریں گے۔ ٹرمپ نے کہا کہ کم جونگ اُن کا خط کافی دلچسپ تھا۔ شمالی کوریا بھی جوہری ہتھیاروں کا مکمل خاتمہ چاہتا ہے۔ ایک سوال پر ٹرمپ نے کہا کہ بات چیت کے دوران پیونگ یانگ پر مزید پابندیاں عائد نہیں کی جائیں گی ۔