چارسدہ سے بھارتی جاسوس تین بیٹوں سمیت گرفتار

پشاور (92نیوز) چارسدہ سے مبینہ بھارتی جاسوس گرفتار ہوا ہے جو افغانستان میں انڈین قونصلیٹ کا اہلکار بھی بتایا جا رہا ہے جبکہ ملزم کے تین بیٹے بھارتی خفیہ ایجنسی ”را“ کے پے رول پر کام کرنے کا بھی انکشاف ہوا ہے۔ تفصیلات کے مطابق باچا خان یونیورسٹی پر حملے کے بعد قانون نافذ کرنے والے اداروں نے چارسدہ میں دہشت گردوں کے خلاف گھیرا تنگ کر لیا ہے۔ کارروائی کے دوران ایک غیر ملکی باشندے کو گرفتار کیا گیا ہے جو بھارتی جاسوس بتایا جاتا ہے۔ نوید خان نامی اس مبینہ جاسوس کا اصل نام خان آغا ہے جو افغانستان میں بھارتی قونصل خانے کا ملازم ہے۔ خان آغا کو تین بیٹوں سمیت چارسدہ سے گرفتار کیا گیا۔ یہ بھی معلوم ہوا ہے کہ خان آغا ایک عرصے سے چارسدہ میں رہائش پذیر تھا اور نوید خان کے نام سے پاکستانی شناختی بھی بنا رکھا تھا۔ ابتدائی تفتیش کے مطابق خان آغا کے تین بیٹے بھارتی خفیہ ایجنسی ”را“ کے پے رول پر ہیں۔ خان آغا کو تینوں بیٹوں سمیت نامعلوم مقام پر منتقل کر دیا گیا ہے جن سے مزید اہم انکشافات متوقع ہیں۔