نیول چیف کی زیرصدارت کمانڈاینڈاسٹاف کانفرنس،آپریشنل تیاریوں،ترقیاتی منصوبوں پرغور
اسلام آباد ( 92 نیوز) چیف آف دی نیول اسٹاف ایڈمرل ظفر محمود عباسی کی زیر صدارت پاک بحریہ کی کمانڈ اینڈ اسٹاف کانفرنس کا انعقاد کیا گیا ، کانفرنس میں پاک بحریہ کی آپریشنل تیاریوں،ترقیاتی منصوبوں،موجودہ سکیورٹی صورت حال اورٹروپس کی ٹریننگ و فلاح سے متعلق مختلف اُمور کا جائزہ لیا گیا۔
کانفرنس میں چیف آف دی نیول اسٹاف کو پاک بحریہ کے مختلف جاری اور مستقبل کے منصوبوں پر بریفنگ دی گئی۔چیف آف دی نیول اسٹا ف نے موجودہ میری ٹائم چیلنجز بشمول میری ٹائم سکیورٹی کے حوالے سے پاکستان نیوی کی آپریشنل تیاریوں پر اطمینان کا اظہار کیا اور پاک بحریہ کے ٹروپس کے بلند جذبے اور لگن کو سراہا ۔
کمانڈ اینڈ اسٹاف کانفرنس کوپا ک بحریہ کی فیصلہ سازی کے نہایت اہم اجلاس کی حیثیت حاصل ہے ،جس میں چیفس آف اسٹاف، تمام پرنسپل اسٹاف آفیسرز اور فیلڈ کمانڈرز پاک بحریہ کی دفاعی پالیسیوں اور منصوبوں کا جائزہ لیتے ہیں۔
