نیب ریفرنسز : عاصمہ جہانگیر کے انتقال پر سوگ کے باعث سماعت 15 فروری تک ملتوی
![نیب ریفرنسز : عاصمہ جہانگیر کے انتقال پر سوگ کے باعث سماعت 15 فروری تک ملتوی](https://urdu.92newshd.tv/wp-content/uploads/2018/01/nab-2.jpg)
اسلام آباد (92 نیوز) احتساب عدالت نے عاصمہ جہانگیر کے انتقال پر سوگ کے باعث نیب ریفرنسز کی سماعت 15 فروری تک ملتوی کر دی ۔
احتساب عدالت کے جج محمد بشیر نے شریف خاندان کے خلاف نیب ریفرنسز کی سماعت کی ۔
سابق وزیر اعظم میاں نوازشریف ، ان کی صاحبزادی مریم نواز اور داماد کیپٹن (ر) صفدر پیش ہوئے ۔
شریف خاندان کے وکیل امجد پرویز نے نوازشریف ، مریم نواز اور کیپٹن (ر) صفدر کی 19 فروری سے 2 ہفتوں کے لئے حاضری سے استثنیٰ کی درخواست دائر کی جس میں موقف اختیار کیا گیا کہ بیگم کلثوم نواز کا علاج آخری مراحل میں ہے ۔ خاندان کا ان کے پاس ہونا بہت ضروری ہے ۔ نواز شریف نے پہلے بھی عدالتوں کا احترام کیا ہے ۔ ان کی اور مریم نواز کی عدم حاضری پر کبھی عدالتی کارروائی متاثر نہیں ہوئی ۔
دوران سماعت امجد پرویز نے موقف اختیار کیا کہ عاصمہ جہانگیر کے انتقال کے باعث پاکستان بار کونسل 3 روزہ سوگ منا رہی ہے ۔ عدالتوں میں مقدمات کی سماعت نہیں ہو رہی ۔ اسی وجہ سے خواجہ حارث بھی پیش نہیں ہوئے ۔
عدالت نے سماعت 15 فروری کو دن 12 بجے تک ملتوی کرتے ہوئے چاروں گواہان کو دوبارہ طلب کر لیا ۔
عدالت نے یہ بھی قرار دیا کہ استغاثہ کے بیرون ملک موجود 2 گواہان کے ویڈیو لنک کے ذریعے بیانات 22 فروری کو ریکارڈ کئے جائینگے ۔