مسئلہ کشمیر جوہری جنگ کا باعث بن سکتاہے ، امریکی تھنک ٹینک

واشنگٹن ( 92 نیوز) امریکی تھنک ٹینک نے خبردار کردیا کہ مسئلہ کشمیر پاکستان اور بھارت کے درمیان جوہری جنگ کا باعث بن سکتا ہے، سٹارٹ فور کی رپورٹ کے مطابق ایٹمی ہتھیاروں کے استعمال میں پہل کی بھارتی دھمکی نے خطے کا امن خطرے میں ڈال دیا ہے،مسئلہ   کشمیر بھارت کا اندرونی معاملہ نہیں ہے۔ سٹارٹ فور کی رپورٹ کے مطابق جوہری صلاحیت کے حامل ممالک پاکستان اور بھارت کے درمیان اس وقت کشیدگی عروج پر ہے، جس کا آغاز مقبوضہ کشمیر کی خصوصی حیثیت کو آئینی طور پر ختم کرنے سے ہوا۔ رپورٹ میں کہا گیا ہے کہ بھارتی وزیر دفاع راج ناتھ سنگھ کے بیان نے جلتی پر تیل کا کام کیا ہے جس میں انھوں نے جوہری ہتھیار کے استعمال میں پہل کی دھمکی دی تھی۔

صاف ظاہر ہے کشمیر میں حالات نارمل نہیں، راہول گاندھی

سٹارٹ فور کی رپورٹ میں بتایا گیا ہے کہ بھارت اور پاکستان کی افواج کے پاس اسٹریٹجک اور ٹیکٹیکل جوہری ہتھیار ہیں جو میدان جنگ میں بڑی آبادی کو نشانہ بنانے کیلئے استعمال ہوسکتے ہیں، اگر ایسا ہوا تو یہ انیس سو پنتالیس کے ہیروشیما اور ناگاساکی کی امریکا کے ہاتھوں تباہی کے بعد ایٹمی ہتھیاروں کا پہلا استعمال ہوگا۔ رپورٹ میں مزید کہا گیا رواں سال فروری میں پاک فوج نے بھارتی طیارہ مار گرایا تھا تاہم یکم مارچ کو اسکے پائلٹ ابھی نندن کو بھارت کے حوالے کردیا گیا تھا لیکن نریندر مودی نے اسلام آباد کے جذبہ خیر سگالی کا اعتراف کیا اور نہ ہی ان کی حکومت کشمیر تنازع پر بات چیت کو تیار ہے ۔ تھنک ٹینک نے اس بات کو مسترد کردیا کہ کشمیر کا مسئلہ بھارت کا اندرونی معاملہ ہے۔