محسن فخری زادے کے قتل کے بعد مشرق وسطیٰ میں کشیدگی پھر بڑھ گئی
ایران نے اسرائیل پر محسن فخری زادے کے قتل کا الزام لگاتے ہوئے بدلہ لینے کا اعلان کیا ہے جبکہ اسرائیل نے دنیا بھر میں اپنے سفارتخانوں کو ہائی الرٹ کردیا۔
ایرانی سائنسدان ایٹمی پروگرام کا باپ سمجھے جانے والے محسن فخری زادے کے قتل نے مشرق وسطی کو ایک بار پھر خوفناک صورتحال کی جانب دھکیل دیا۔
ایران کے صدر حسن روحانی نے کہا ہے کہ ایران صحیح وقت پر محسن فخری زادہ کے قتل کا بدلہ لے گا۔ حسن روحانی نے جوہری سائنسدان کو قتل کرنے کے لیے اسرائیل پر امریکی زرخرید کے طور پر کام کرنے کا الزام لگایا۔
ایران کے سپریم لیڈر آیت اللہ علی خامنہ ای نے بھی جوہری سائنس دان محسن فخری زادہ کے قتل کا بدلہ لینے کا اعلان کیا۔ اُنہوں نے ملک کی ایجنسیوں پر سائنس دان کے قتل کے ذمہ داروں کا تعین کرکے اُن کے خلاف جوابی کارروائی پر زور دیا۔
کشیدہ صورتحال کے پیش نظراسرائيل نے دنيا بھر ميں اپنے سفارت خانوں کو ہائی الرٹ کر ديا۔۔اسرائیل، امریکا، پینٹاگون یا کسی دوسرے ملک کی جانب سے کوئی ردعمل سامنے نہیں آیا۔ تجزیہ کار اس خاموشی کو کسی طوفان کا پیش خیمہ بتاتے ہیں۔