موسم بہار کی آمد کیساتھ ہی پانی بھرے بادلوں نے پاکستان کا رخ کرلیا
لاہور (92نیوز) مارچ شروع ہوتے ہی بادلوں کا پاکستان کی طرف مارچ۔ کوئٹہ سمیت بلوچستان کے مختلف علاقوں میں بارش۔ آج اور کل اندرون سندھ‘ جمعہ اور ہفتہ کو پنجاب اور خیبرپختونخوا میں رم جھم ہو گی۔ تفصیلات کے مطابق پاکستان کے جنوبی علاقوں سے بارش برسانے والا نیا سسٹم ملک میں داخل ہو گیا۔ بلوچستان کے بیشتر شہروں میں آج سے گرج چمک کے ساتھ بادل برسیں گے۔ سکھر‘ لاڑکانہ اور ڈیرہ اسماعیل خان ڈویژن میں بھی تیز ہوا کے ساتھ بارش کا امکان ہے۔
کوئٹہ میں آسمان سے آج بوندیں گریں تو شہریوں کے چہرے کھل اٹھے اور وہ بھیگے موسم سے لطف اٹھاتے رہے۔ قلات‘ مکران‘ ژوب اور نصیرآباد ڈویژن میں چوبیس گھنٹے کے دوران بارش کی پیش گوئی کی گئی ہے۔ بلوچستا ن میں بارش کا نیا سسٹم جمعرات تک رہے گا۔ اس دوران بیشتر شہروں میں تیز ہوا اور گرج چمک کے ساتھ بادل برسیں گے۔
سکھراور لاڑکانہ ڈویژن میں بدھ اور جمعرات کو موسم مہربان ہو گا جبکہ جمعہ اور ہفتے کو بارش برسانے والے بادل پنجاب اور خیبرپختونخوا میں داخل ہوں گے جس کے باعث یہاں تیز ہوا کے ساتھ تیز بارش ہو سکتی ہے۔ اس دوران گلگت بلتستان اور آزادکشمیر میں کہیں بارش اور برف باری کا بھی امکان ہے۔