صیہونی فورسز کیساتھ جھڑپ میں مزید 70 افراد زخمی ہو گئے
![صیہونی فورسز کیساتھ جھڑپ میں مزید 70 افراد زخمی ہو گئے](https://urdu.92newshd.tv/wp-content/uploads/2018/03/israel.jpg)
غزہ (92 نیوز) فلسطین میں یوم الارض کے سلسلے میں دوسرے روز بھی مقبوضہ بیت المقدس، بیت الحم سمیت مختلف شہروں میں مظاہرے کیے گئے ۔ اس دوران صیہونی فوج نے مظاہرین پر ربڑ کی گولیاں برسائیں اور آنسو گیس کی شیلنگ کی جس سے کئی افراد زخمی ہو گئے ۔
فلسطین میں دوسرے روز بھی اسرائیلی بربریت کیخلاف مظاہروں کا سلسلہ جاری رہا ۔ صیہونی فورسز کیساتھ جھڑپ میں مزید ستر افراد زخمی ہو گئے ۔ غزہ کی سرحد پر اسرائیلی فائرنگ سے شہید ہونے والوں کو سپرد خاک کر دیا گیا ۔
دوسری طرف خان یونس اور رفاح میں جمعے کو غزہ بارڈر پر فائرنگ سے شہید ہونے والے سولہ افراد کی نماز جنازہ ادا کی گئی ۔
شرکا اپنے پیاروں کی یاد میں دھاڑیں مار کر روتے رہے ،تاہم آزادی کا جذبہ متزلزل نہیں ہونے دیا ۔
اُدھر امریکا نے غزہ واقعے پر بلایا گیا اقوام متحدہ کی سکیورٹی کونسل اجلاس کا اعلامیہ بلاک کر دیا ۔
مجوزہ اعلامیے میں انسانی جانوں کے ضیاع پر افسوس کا اظہار کرتے ہوئے واقعے کی شفاف تحقیقات کا مطالبہ کیا گیا تھا ۔
اعلامیہ بلاک کرنے پر فلسطین نے امریکا کو کڑی تنقید کا نشانہ بنایا ۔
فلسطینی وزیر خارجہ ریاض المالکی نے کہا کہ سکیورٹی کونسل میں امریکی حمایت کے بغیر اسرائیل فلسطینیوں پر مظالم کی جرات نہیں کر سکتا ۔