Saturday, January 28, 2023

زلفی بخاری کی غیر تسلی بخش کارکردگی ،وزارت اوور سیز کے امور متاثر

زلفی بخاری کی غیر تسلی بخش کارکردگی ،وزارت اوور سیز کے امور متاثر
اسلام آباد ( 92 نیوز)وزیراعظم کے معاون خصوصی زلفی بخاری  کی غیرتسلی بخش کارگردگی  کے باعث وزارت اوورسیز پاکستانیز اینڈ ہیومن ریسورس ڈویلپمنٹ کے امور بری طرح متاثر ہونے لگے ۔ ماتحت اداروں میں کرپشن، اقربا پروری کا سلسلہ بڑھ گیا ،، ای او بی آئی میں تین افسران کی خلاف ضابطہ تعینات کا بھی انکشاف  ہوا ہے ، وزیراعظم کو تحریری شکایت موصول ہونے کے بعد انکوائری شروع ہو گئیں ۔ وفاقی وزیر کا عہدہ خالی ہونے اور وزیراعظم کے معاون خصوصی سید ذوالفقارعباس بخاری(زلفی بخاری ) کی غیر تسلی بخش کارگردگی کے باعث وزارت اوورسیز پاکستانیز اینڈ ہیومن ریسورس ڈیویلپمنٹ کے امور بری طرح متاثر ہوچکے ہیں۔ زلفی بخاری نے ستمبر 2018 کے بعد سے اب تک 7غیرملکی دورے کئے ہیں، ان  کی خواہش پر وزارت میں انکے دفتر کی خصوصی تزئین وآرائش کی گئی تاہم دوسری طرف وزارت کے ماتحت 7اہم ترین اداروں کی کارگردگی ہرگزرے دن کیساتھ خراب ہورہی ہے ۔ مزدورں کی فلاح وبہبود کیلئے قائم ادارے کی گاڑیاں زلفی بخاری کے سٹاف کے زیر استعمال ہیں۔ غریب بوڑھے محنت کشوں او ربیواؤں کو اپنی جائز پنشن کے حصول میں شدید مشکلات کا سامنا ہے جبکہ بعض بے سہارا بیواؤں کی پنشن رک چکی ہے ۔

زلفی بخاری کی دہری شہریت کا جائزہ لیں گے ، چیف جسٹس پاکستان

اعلیٰ حکومتی واہم شخصیت کی ذاتی کاوشوں پر قطروسعودی عرب سمیت مختلف ممالک کی جانب سے پاکستانی لیبر کا کوٹہ بڑھانے پر رضامندی ظاہرکی گئی تاہم ثمرات منتقل نہیں کرپائے ۔ نائنٹی ٹو نیوز کوموصول دستاویز کے مطابق سابق چیئرمین ای او بی آئی ظفرگوندل کے دور میں پنشن فنڈ میں 100ارب روپے کے میگاسکینڈل کی ریکوری نہیں ہوسکی اور ملزمان بھی تاحال آزاد ہیں۔اس ضمن میں زلفی بخاری نے کوئی اقدامات نہیں کئے جبکہ پنشن فنڈ تیزی سے تنزلی کا شکار ہے ۔ ای او بی آئی میں فنانس کیڈر کے جو نیئر افسران کلیدی عہدوں پر قابض ہیں اورمبینہ طور پر بدعنوانی میں اضافہ ہورہا ہے ۔ ای او بی آئی کے 3 افسران وزارت اوورسیز پاکستانیزاسلام آبادمیں خلاف ضابطہ تعینات ہیں ۔ ان میں سے ثمان علی شاہ کو زلفی بخاری کا پرسنل سٹاف افسر مقرر کیا گیاہے ۔ حکام کے مطابق وزیراعظم کو موصول شکایت پر انکوائری کا سلسلہ شروع کردیا گیا ہے ۔ ادھر ورکز ویلفیئر فنڈ میں بھی خلاف قانون تعیناتیاں ہوئی ہیں جبکہ اعلیٰ افسران نے خلاف قانون اپنے بچوں کو نجی میڈیکل کالجز میں پڑھانے کیلئے سالانہ لاکھوں روپے فیس اور کروڑوں روپے کی مراعات حاصل کیں لیکن صنعتی ورکرز کو ریلیف نہیں مل رہا ۔ ترجمان وزارت اوورسیز پاکستان اور پی ایس ٹومعاون خصوصی خالد خان سے رابطہ کرنے کے باوجود موقف حاصل نہیں کیا جاسکا۔