بحیرہ عرب میں پاک بحریہ کا جہاز شکن میزائل کا کامیاب تجربہ

اسلام آباد (92 نیوز) پاکستان ہر دشمن کیلئے ناقابل تسخیر ہو گیا۔ پاک بحریہ نے ایک اور سنگ میل عبور کر لیا ۔ بحیرہ عرب میں پاک بحریہ کا جہاز شکن میزائل کا کامیاب تجربہ ہوا۔ جس میں فضا سے سمندر میں ہدف کو نشانے بنانے کی صلاحیت کے حامل میزائل ہیلی کاپٹر سے سمندر میں ہدف کو نشانہ بنایا گیا

ترجمان پاک بحریہ کے مطابق شمالی بحیرہ عرب میں فائر پاور کے مظاہرے کے دوران پاکستان نیوی کے سی کنگ ہیلی کاپٹر نے فضا سے سطح آب میں مار کرنے والے اینٹی شپ میزائل فائر کیا۔ کھلے سمندر میں فائر کئے گئے اس میزائل نے اپنے ہدف کو پوری کامیابی کے ساتھ نشانہ بنایا۔ اس موقع پر چیف آف دی نیول اسٹاف ایڈمرل محمد ذکا اللہ بھی موجود تھے۔

 ایڈمرل ذکا اللہ کا کہنا تھا کہ پاکستان نیوی فلیٹ کی جنگی تیاریوں پر فخر ہے اور پاک بحریہ کے ہیلی کاپٹر سی کنگ سے کامیاب فائرنگ پاکستان نیوی فلیٹ کی جنگی تیاری اور پیشہ وارانہ صلاحیتوں کا واضح ثبوت ہے۔ ان کا مزید کہنا تھا کہ بحری مشقوں میں شامل افسران اور جوانوں کی پیشہ وارانہ صلاحیتیں قابل ستائش ہیں پاک بحریہ وطن عزیز کی بحری سرحدوں اور مفادات کا ہرقیمت پر تحفظ کرے گی۔