عمران خان کا امریکا کا دورہ صرف 50 ہزار ڈالر میں ہو رہا ہے ، نعیم الحق

عمران خان امریکا دورہ 50 ہزار ڈالر نعیم الحق
۲۱ جولائی, ۲۰۱۹ ۱۰:۳۹ دن

 اسلام آباد (92 نیوز) وزیر اعظم کے معاون خصوصی نعیم الحق نے کہا عمران خان کا امریکا کا دورہ صرف 50 ہزار ڈالر میں ہو رہا ہے۔ یہ کفایت شعاری مہم کا حصہ ہے جس میں تمام غیر ضروری اخراجات کا خاتمہ کیا جارہا ہے۔

وزیر اعظم کے دورہ امریکا پر مریم نواز نے ٹویٹ کیا تو وزیراعظم کے معاونین خصوصی فردوس عاشق اعوان اور نعیم الحق نے مریم نواز کو نشانے پر رکھ لیا۔

فردوس عاشق اعوان نے مریم نواز کو کرارا جواب دیتے ہوئے ٹویٹ کیا بیگم صفدر اعوان صاحبہ! عمران خان کے بغض میں حقائق مسخ نہ کریں۔

مزید لکھا جنرل کیانی نے یوسف رضا گیلانی کے ساتھ امریکہ کا دورہ کیا۔ جنرل راحیل سعودیہ کے دورے میں آپ کے والد کے ساتھ تھے۔ اسی طرح جنرل قمر جاوید باجوہ اور شاہد خاقان نے بھی سعودی عرب کا دورہ کیا۔ کیا یہ تین وزراء اعظم سلیکٹڈ تھے؟

دوسری جانب نعیم الحق نے بھی مریم نواز کو نوازشریف کے شاہانہ خرچے  یاد کرا دیے۔ ٹویٹ کیا کہ سابقہ دور میں نواز شریف نے امریکہ کے دورے پر 4 لاکھ 60 ہزار ڈالر کا سرکاری خرچ کیا۔ عمران خان کا امریکہ کا دورہ صرف 50 ہزار ڈالر میں ہو رہا ہے۔

تازہ ترین ویڈیوز