Thursday, May 6, 2021
٩٢ نیوز انگلش آج کا اخبار براہراست نشریات(UK) براہراست ٹی وی
٩٢ نیوز انگلش آج کا اخبار
براہراست نشریات(UK) براہراست ٹی وی

سپریم کورٹ کا ایف ایٹ کچہری میں وکلاء کے چیمبرز گرانے بارے رپورٹ پر عدم اطمینان کااظہار

سپریم کورٹ کا ایف ایٹ کچہری میں وکلاء کے چیمبرز گرانے بارے رپورٹ پر عدم اطمینان کااظہار
April 13, 2021

اسلام آباد (92 نیوز) سپریم کورٹ نے ایف ایٹ کچہری میں وکلا کے چیمبرز گرانے سے متعلق رجسٹرار رپورٹ پر عدم اطمینان کا اظہار کر دیا۔ عدالت نے رجسٹرار اسلام آباد ہائی کورٹ کو توہین عدالت کا شوکاز نوٹس جاری کر دیا ۔

چیف جسٹس پاکستان کی سربراہی میں سپریم کورٹ کے دو رکنی بنچ نے وکلا کے چیمبرز گرانے سے متعلق نظر ثانی کیس کی سماعت کی۔عدالت نے ایف ایٹ کچہری میں عدالتیں گرانے سے متعلق رجسٹرار رپورٹ پر عدم اطمینان کا اظہار کرتے ہوئے رجسٹرار اسلام آباد ہائی کورٹ کو توہین عدالت کا شوکاز نوٹس جاری کرتے ہوئے سات روز میں جواب طلب کرلیا۔

ایڈیشنل اٹارنی جنرل نے بتایا کہ ایف ایٹ کچہری میں عدالتوں کی غیر قانونی تعمیرات کو گرا دیا گیا، رجسٹرار اسلام آباد ہائی کورٹ نے عمل درآمد رپورٹ جمع کرادی ہے۔

چیف جسٹس نے کہا کہ رجسٹرار نے ہمارے احکامات کو سنجیدہ نہیں لیا بلکہ اپنے جونیئر افسران پر کام چھوڑ دیا کیوں نہ اسے عہدے سے معطل بھی کردیں۔ماتحت عدالتوں کا ڈھانچہ ہماری کوششوں سے گرایا گیا۔رجسٹرار نے تو کچھ بھی نہیں کیا، رجسٹرار کو توہین عدالت میں سزا ہوئی تو نوکری سے بھی فارغ ہو جائے گا۔عدالت نے کیس کی سماعت سات روز کے لیے ملتوی کردی۔